Prajñāpāramitāstutiḥ

Technical Details
  • Text Version:
    Romanized
  • Input Personnel:
    DSBC Staff
  • Input Date:
    2004
  • Proof Reader:
    Miroj Shakya
  • Supplier:
    Nagarjuna Institute of Exact Methods
  • Sponsor:
    University of the West
Parallel Devanāgarī version

प्रज्ञापारमितास्तुतिः

prajñāpāramitāstutiḥ



om namaḥ śrīprajñāpāramitāyai



nirvikalpe nirālambe niravadye niraṃjane |

nityānitye nirvikāre prajñe devi namo'stu te || 1 ||



buddhānāṃ jananīśāni bodhisattvapitāmahi |

prapitāmahi sattvānāṃ prajñe devi namo'stu te || 2 ||



mātarmātarjaganmātariti saṃjapatāṃ nṛṇām |

manorathaprade śuddhe prajñe devi namo'stu te || 3 ||



lakṣmīstvamasi kalyāṇi śrīrdhīḥ śraddhā dhṛtiḥ smṛtiḥ |

sarvasvarūpe sarveśi prajñe devi namo'stu te || 4 ||



lokottare laukike ca prajñāpāramite'mite |

daśa pāramitākāre prajñe devi namo'stu te || 5 ||



śrīprajñāpāramitāstutiḥ samāptā |